БИШКЕК, 24-апр. — Sputnik. Кырдаал оор болуп жатса ӨКМдин жетекчилиги командировкага кетип калганы жоопкерчиликсиздик. Мындай сынды Жогорку Кеңештин жыйынында депутат Улугбек Ормонов билдирди.
Сессиянын жүрүшүндө ӨКМдин жетекчилигин парламентке чакырып, селден жабыр тарткан аймактар боюнча маалымат угуу зарылдыгы белгиленген.
Вице-спикер Нурланбек Азыгалиев ӨКМ селдин кесепеттери менен күрөшүп жатканын айтты.
"Министр менен байланышкам, анын төрт орун басары чет өлкөдө командировкада экенин айтты", — деди ал.
Ал эми депутат Ормонов Ош облусунда өзгөчө кырдаал киргизилгенин эске салды.
"Абал оор болуп турат. Ушундай курч кырдаал болуп жатса ӨКМ жетекчилиги командировкага кетип калганы жоопкерчиликсиздик", — деди эл өкүлү.
Натыйжада Жогорку Кеңештин 25-апрелдеги күн тартибине ӨКМдин маалыматын угуу маселеси киргизиле турган болду.