БИШКЕК, 23-апр. — Sputnik. Талас облусунда акыркы 30 жылдан бери төө буурчактын сорту жаңыланбай, түшүмдүүлүк жана продукциянын сапаты төмөндөп кеткен. Бул тууралуу Айыл чарба министрлиги билдирди.
Ведомство бул көйгөйдү чечүү максатында өнөктөштөрү менен биргеликте Голландия мамлекетинен "хельда" деп аталган жаңы сорттогу төө буурчакты алып келгенин белгиледи.
Бакай-Ата сорт сыноо жайында төө буурчактын "хельда" түрү сыноодөн өткөрүлгөн. Жаңы сорт түшүмдүүлүгү менен сапаты жагынан жакшы натыйжаларды берген.
"Жаңы сорттогу төө буурчакты өстүрүү менен Талас облусунун дыйкандары түшүмдүүлүктү жогорулатат. Мындан улам өндүрүш менен киреше артып, экспортко мүмкүнчүлүк түзүлөт", — дешти министрликтен.