"Эл үмүтү" президенттик стипендиясына 2022-жылы 22 бала тапшырып, учурда 16 бала дүйнөдөгү мыкты университеттерде окуп жатат. Бул тууралуу Айзат Маматкеримова Sputnik Кыргызстан радиосуна маек куруп жатып билдирди.
Анын айтымында, аталган президенттик стипендияга сынак 1-майда башталып, 30-майга чейин жүрөт.
"Бул стипендияга жыл сайын 50 орун бөлүнөт. Анын ичинен техникалык жана инженердик багыттар боюнча магистрлерди даярдоого — 20, экономикалык багыттар боюнча — 10, социалдык-гуманитардык багыттар боюнча — 10, философия доктору PhD программалары боюнча окутуу үчүн 10 стипендия каралган. Бирок 50 орун толбой калууда. Быйыл талапкерлердин саны жылдагыдан көп. Негизинен сынакка 40 жашка чейинки Кыргызстандын жарандары катыша алат. Ал эми PhD программаларына 45 жашка чейин каралат. Ошону менен катар чет тилин билгендигин тастыктаган сертификат жана илимий иштерин жүргүзгөн же ага катышканын далилдеген документ жана башкалар керек. Жылына ар бир талапкердин окуусуна гана 50 миң доллар бөлүнөт. Ал эми жатакана, тамак-аш, жол кире маселелери токтомго кирген эмес. Бирок талапкер окуу акысынан канча бир пайыз жеңилдик алса же толук бошотконун далилдеп, өтүнүч менен комиссияга кайрылса, анда ошол 50 миң доллардын окуу акысынан ашкан бөлүгүн студенттин жатаканасына бөлүү жагы каралат", — деди Маматкеримова.
Ал "Эл үмүтү " стипендиясынын келечеги алдыда экенин кошумчалады.