Президент Садыр Жапаров Франция Сенатынын делегациясын кабыл алды. Бул тууралуу мамлекет башчынын маалымат кызматы билдирди.Жолугушууда саясий, инвестициялык, энергетикалык жана маданий-гуманитардык тармактардагы кыргыз-француз эки тараптуу мамилелери тууралуу пикир алмашуу болгон."Садыр Жапаров парламенттер аралык байланыштарды бекемдөө, анын ичинде өз ара сапарларды, парламентарийлердин жолугушууларын уюштуруу өлкөлөр ортосундагы саясий диалогду өнүктүрүүдө маанилүү роль ойной турганын баса белгиледи", — деп айтылат маалыматта.Тараптар туризмди өнүктүрүү жаатында эки өлкөнүн кызматташтыгынын келечеги тууралуу пикир алмашканы айтылды. Ошондой эле Садыр Жапаров француз сенаторлорунун Кыргызстанга болгон сапарынын алкагында Нарын, Каракол, Жыргалаң жана Ысык-Көлгө баруу ниетин кубаттаганы белгиленди.Аягында тараптар эки өлкөнүн ортосундагы мамилелерди кеңейтүүгө салым кошууга даяр экендиктерин тастыкташкан.
Президент Садыр Жапаров кечээ, 22-апрелде, Улуу Британиянын тышкы иштер министри Дэвид Кэмеронду кабыл алганын мамлекет башчынын маалымат кызматынан кабарлашты.Жолугушуу учурунда кыргыз-британ эки тараптуу кызматташуунун саясий, соода-экономикалык, инвестициялык, энергетикалык жана транспорт тармактарындагы келечеги боюнча пикир алмашуу болгон.Мындан сырткары, тараптар билим берүү, сезондук миграция жана аймактык, эл аралык күндемдин маанилүү маселелери боюнча да кеп кылышкан.Мындан мурдараак Кэмерон тышкы иштер министри Жээнбек Кулубаев менен да жолуккан. Ал британиялык кесиптешине кызматташуунун потенциалдуу багыттары жөнүндө айтып берген. Кэмерон да мамлекети Борбор Азия, анын ичинде Кыргызстан менен кызматташууну кеңейтүүгө кызыкдар экенин билдирген.ТИМдин маалымат кызматы Британия тарап уставдык капиталы 19 миллион фунт стерлинг болгон атайын фондду түзүү менен аймактагы чакан жана орто бизнеске колдоо көрсөтүүгө даяр экенин айтышканын билдирди.
Министрлер кабинетинин төрагасы Акылбек Жапаров "Өлкө аймактарын өнүктүрүү үчүн интеллектуалдык менчик жана инновациялар: ийгиликтүү келечекке бирге" улуттук форумуна катышты. Бул тууралуу өкмөттүн маалымат кызматы кабарлады.Билдирүүгө ылайык, анда Жапаров сөз сүйлөп, интеллектуалдык менчик социалдык-экономикалык өсүштүн жана инвестиция тартуунун кыймылдаткыч күчүнө айланганын белгиледи."Интеллектуалдык менчиктин экосистемасын өнүктүрүү, анын ичинде рыноктук инфраструктураны, экономиканын реалдуу секторунда инновациялык чечимдерди ишке ашыруу үчүн интеллектуалдык менчикти коммерциялаштыруу механизмдерин калыптандыруу маанилүү", — деген Жапаров.Ошондой эле ал өкмөт IT-индустриясын өнүктүрүү боюнча демилгелерди колдоого даяр экенине токтолуп, жаңы технологиялар келечек муун үчүн жаңы чакырыктарга айланганын кошумчалады.
Жусупбек Коргонбай уулунун ыйгарым укуктары мөөнөтүнөн мурда токтотулду. Маселе БШКнын 23-апрелдеги жыйналышынын күн тартибинде каралды. Анда Борбордук шайлоо комиссиясынын бардык мүчөсү эл өкүлүнүн ишмердүүлүгүн токтотууга макулдугун берген.Белгилей кетсек, Жусупбек Коргонбай уулу 22-апрелде мандатын тапшыруу боюнча арыз жазган. Ал Жогорку Кеңешке бир мандаттуу система менен Ноокат шайлоо округунан шайланып келген. Мыйзам боюнча, эки ай ичинде аталган аймакта кайра шайлоо өтүшү керек.