Президент Садыр Жапаров "Азербайжан-Кыргыз өнүктүрүү фондунун Кыргызстанда иштөөсүнүн шарттары жөнүндө макулдашууну ратификациялоо жөнүндө" мыйзамга кол койду. Бул тууралуу президенттин маалымат кызматы билдирди. Кабарга ылайык, тийиштүү мыйзам Жогорку Кеңеш тарабынан 17-апрелде кабыл алынган. Максаты — Кыргызстанда фонддун иши үчүн жагымдуу шарттарды түзүп берүү. Макулдашууга ылайык: фонддун имараттары кол тийгис, мамлекеттик органдардын өкүлдөрү ага кыргыз жана азербайжан тараптын теңтөрагаларынын макулдугу менен кире алат. фонддун чет өлкөлүк кызматкерлери дипломатиялык өкүлдөргө колдонулган артыкчылыктарды, иммунитеттерди жана жеңилдиктерди пайдаланат. Фонд бажы алымдарынан, салыктардан жана ушуга байланыштуу жыйымдардан бошотулат. Эске салсак, 2022-жылы Азербайжан президенти Илхам Алиевдин Кыргызстанга болгон мамлекеттик сапарынын алкагында аталган фондду түзүү макулдашылган. Анын уставдык капиталы 25 миллион долларды түзүп, штаб-квартирасы Бишкек шаарында жайгашмакчы.
Токтогул суу сактагычына суунун келиши коротулгандан кыйла жогорулоодо. Бул тууралуу "Электр станциялары" ААКтын маалыматына таянуу менен "Апенди Бизнесмен" Telegram каналы билдирди.22-апрелге карата суунун агып кириши секундасына 559 метр кубду, агып чыгышы 165 метр кубду түзүп жатат. Белгилей кетсек, 11-апрелден тарта суу керектелгенден көп агып келе баштады, бирок акыркы күндөрү айырма кыйла өстү. Натыйжада өлкөнүн башкы суу сактагычындагы суунун көлөмү көбөйдү, мисалы, 16-апрелде 7,3 миллиард метр куб болсо, азыр 7,4 миллиард метр кубдан ашты. Эске сала кетсек, Токтогул ГЭСи Кыргызстандагы эң ири энергетикалык объект болуп саналат.
Бишкекте 19-апрелде шаардык перинаталдык борбордо кесарево жолу менен үч эм төрөлдү. Саламаттыкты сактоо министрлигинен кабарлашкандай, Ош шаарынын 35 жаштагы тургуну кош бойлуулугунун 33-жумасында эрте төрөт коркунучу менен ооруканага түшкөн. 1930 гр., 2660 гр., 2660 гр. салмактагы эркек балдар төрөлгөн. Алгачкы суткада наристелер реанимация бөлүмүндө көзөмөлдө болушкан. Бүгүнкү күндө алар ара төрөлгөн ымыркайларга кам көрүүнүн 2-баскычындагы бөлүмдө. Жаңы төрөлгөн ымыркайлардын жана эненин абалы канааттандырарлык.