БИШКЕК, 21-апр. — Sputnik. Режиссер Бегалы Наргозуевдин "Жылкычы чымчык" толук метраждуу тасмасы Франциядагы эл аралык фестивалга катышат. Бул тууралуу Кинематографияны өнүктүрүү фонду билдирди.
Фестиваль 13-майдан 15-майга чейин Ницца шаарында өтөт.
Анда фильм "Фестивалдын мыкты тасмасы", "Мыкты операторлук иш", "Мыкты костюм" жана "Мыкты тасма" номинациялары боюнча ат салышат.
Иш-чарага режиссер Бегалы Наргозуевден тышкары актерлор Жамила Сыдыкбаева жана Марат Ибраев, ошондой эле тасманын продюсери Афизакан Мырзапаязова барары айтылды.
"Жылкычы чымчык" тасмасынын бет ачары былтыр декабрда болгон. Кинодо экологиялык көйгөй чагылдырылганы айтылат.