БИШКЕК, 20-апр. — Sputnik. Бишкектин жашыл шаар макамына кайтуусу үчүн калаа тургундарынын көмөгү керек. Бул тууралуу президент Садыр Жапаров Энвер Гареев атындагы Ботаникалык бакка реконструкциядан кийин көрүп барганда айтты.
Өлкө башчынын маалымат кызматы билдиргендей, мамлекет башчысы өз сөзүндө шаарлыктар, айрыкча улуу муун, жаңыланып жана жакшы жагына өзгөрүп бара жаткан Бишкектеги өзгөрүүлөрдү кубануу менен кабыл алып жатышканын белгилеген.
"Президент акыркы 15 жылда борбор калаа жашыл шаар макамын жоготконун, парктар тонолуп, алардын жер тилкелери сатылып, жеке колдорго өтүп кеткенин айтты. Мамлекет башчысы учурунда "жашыл шаар" деген ат менен таанылган борборубузду ошол жайкалган жапжашыл көрүнүшүнө алып келүү ниетин белгилеп, бул аракеттерди жалпы мекендештерибиз, айрыкча борбор калаа тургундары ар тараптан колдойт деген ишенимин билдирди", — деп айтылат маалыматта.
Жапаров өз сөзүндө экономиканы өнүктүрүү менен бирге Кыргызстандын жаратылышын сактап калууга багытталган "Жашыл мурас" демилгелерин ишке ашыруу боюнча иш-чаралар жүргүзүлүп жатканына да токтолгон.
Эскерте кетсек, Ботаникалык бакты реконструкциялоо президенттин тапшырмасы менен былтыр башталган. Ага ылайык, президенттик администрация, "Кыргыз курулуш сервис" мамлекеттик ишканасы жана аталган Ботаникалык бакчанын жетекчилери 33 миллион сомдук үч тараптуу келишимге кол коюшкан.
Документтин алкагында коллекциялык декоративдүү өсүмдүктөрдүн көчөттөрү сатып алынган. Отоо чөптөр жана бадалдар тазаланып, сугат суусун топтоо үчүн скважина казылып, тамчылатып сугаруу үчүн атайын мунара орнотулду. Мындан тышкары, аллеялар жана жолдор ремонттолуп, күн батареялары аркылуу жарыктандыруучу жабдуулар коюлду. Лабораториялык имарат салынып, күнөскана оңдолуп-түзөлүүдө.
Жапаров ошондой эле реконструкциялоо жана калыбына келтирүү иштери жолдун аркы тарабында жайгашкан бакчанын 16 гектарында жана Ахунбаев көчөсүндөгү Ботаникалык бакчада жүргүзүлөрүн белгиледи.
Соңунда президент жарандарды жаратылышты коргоого салым кошууга, шаардын тазалыгын сактоого, бак-дарактарды, көчөттөрдү кароого, көрктөндүрүү иштерине жардам берүүгө жана ишембиликтерге активдүү катышууга чакырды.
Эске салсак, Энвер Гареев атындагы Ботаникалык бак 1938-жылы Кыргыз ССР Эл Комиссарлар Кеңешинин 1938-жылдын 13-мартындагы №336 токтому менен негизделген.
Жергиликтүү флораны изилдеп, аны дүйнөнүн ар кыл өлкөлөрүнүн өсүмдүктөрүн интродукциялоо менен байыта баштаган республикадагы биринчи илим-изилдөө мекемеси.
Ботаникалык бак — Кыргыз Республикасынын Улуттук илимдер академиясынын карамагындагы илимий институт.