БИШКЕК, 20-апр. — Sputnik. Россия аскердик кабарчы Семён Ереминдин өлтүрүлүшүн Киевдин кандуу кылмышы катары баалайт. Бул тууралуу ТИМдин атайын өкүлү Мария Захарова ведомствонун Telegram каналында билдирди.
"Журналист атайын эле өлтүрүлгөн. Муну Зеленскийдин режими жасаган кандуу кылмыш катары баалайбыз. Алар Киев режиминин согушкерлеринин кылмыштары боюнча дүйнөлүк коомчулукка маалымат берип, репортаж даярдап, билдирүү тараткан Россиянын коомдук ишмер, аскердик кабарчы, жалпыга маалымдоо каражаттарынын өкүлдөрүнүн артынан түшө башташты", — деген Захарова.
ТИМ тиешелүү эл аралык уюмдардан жана укук коргоо түзүмдөрүнөн россиялык журналисттин өлтүрүлүшүн тез арада жана чечкиндүү түрдө айыптоону талап кылды.
"Алар адаттагыдай унчукпай коюп Киев режиминин медиаөкүлдөрүнө каршы мындан да үрөй учурган террордук чабуулдарына шарт түзүп берүүдө. Ошентип чабуулдун катышуучусу болуп калышат", — деген Захарова.
Россиянын Тергөө комитети аскер кабарчысынын өлүмүнө тиешеси барлардын бардыгын аныктай турганын билдирген.
Ереминдин Запорожье облусунда украиналык FPV-дрондун чабуулунан каза тапканы 19-апрель күнү кечинде белгилүү болгон. Кабарчы атайын операция башталгандан тарта, башкача айтканда, 2022-жылдан бери ошол аймакта иштеп Мариуполдон, "Азовсталь" заводунан, Марьинкадан репортаждарды даярдап турган. Акыркы материалы үч күн мурун чыкканы айтылды.