БИШКЕК, 20-апр. — Sputnik. АКШнын Өкүлдөр палатасынын республикалык партиясынан шайланган Пол Госар Украинаны Крымды таптакыр унутууга чакырды. Саясатчынын сөзүн C-SPAN каналы көрсөткөнүн РИА Новости жазды.
"Президент (Жо Байден — ред.) тынчтык сүйлөшүүлөрүн демилгелемейинче Украинаны каржылоону токтотууга мезгил жетти. Көпчүлүгүбүз Украинадагы жаңжал биз күткөн нукта болбой жатканына күбөбүз. Көп киши көз жуумп жатат, өзгөчө жаштар каза болууда. Жетишет!" — деди конгрессмен.
Саясатчынын айтымында, сүйлөшүүлөрдү демилгелөө учуру келди.
"Жеңиш деген эмне десем Украина мурунку аймактары менен Крымды кайтаруу дейт. Крым эч качан кайтпайт. Ал жакта көпчүлүк Россия менен болууну чечти. Кайтаруу тууралуу сөз ойлонбой айтылууда", — деди Госар.
Эскерте кетсек, Крым Украинадагы мамлекеттик төңкөрүштөн кийин 2014-жылы референдумдун натыйжасында Россияга кошулган. Ал эми Киев ушу кезге чейин жарым аралды оккупацияланган аймак катары санайт, Батыш бул маселеде Украина тарапта. Өз кезегинде Россия жетекчилиги Крымдын жашоочулары Россияга эл аралык укуктун жана БУУ Уставына ылайык демократиялык жол менен кошулганын эскертип келет. Президент Владимир Путиндин айтымында, Крым маселеси "толугу менен жабылган".