БИШКЕК, 19-апр. — Sputnik. Украинанын атайын кызматынын мурдагы подполковниги Василий Прозоровдун унаасын жардырууга шектелген адам Кыргызстандан кармалганын ЖМКлар жазууда.
Аны кыргызстандык жана россиялык күч түзүмдөрү биргеликте колго түшүргөнүн ТАСС агенттигине укук коргоо органдарындагы маалымат булак билдирген.
Шектүү Украинада жашаганын (ал жакта жубайы турат), Россия менен Кыргызстандын жараны экенин РИА Новости билдирүүдө. Ал Москвада убактылуу кармоочу жайга киргизилди.
Прозоров 2014-жылга чейин Украинанын Коопсуздук кызматынын Запорожье облусундагы башкармалыгында, андан кийин антитеррордук борбордо кызмат өтөгөн. 2018-жылы Россияга көчүп келген. Соңку жылдары Киевдин согуштук кылмыштарын иликтөө боюнча иш жүргүзүп жаткан. Өткөн жумада Москвада анын жолтандабасы жардырылып, өзү ооруканага түшкөн. Прозоров аны өлтүрүү аракетине Украинанын Коопсуздук кызматы менен Киев режимин айыптоодо.