БИШКЕК, 16-апр. — Sputnik. Башкы прокурор Курманкул Зулушев Конституциялык мыйзамдар жана Укук тартиби комитеттеринин биргелешкен жыйынында суроого жооп берип жатып, экс-депутат Шайлообек Атазовдун айыптоолоруна жооп берүүгө мүмкүн болбой калганын билдирди.
Белгилей кетсек, мурдагы депутат Атазов парламент трибунасынан Зулушевге кайрылуу жасап, анын дагы Райым Матраимов менен мамилеси бар экенин кыйыткан.
Комитеттердин жыйынында депутат Гуля Кожокулова мурунку кесиптешинин бийик трибунадан прокурорду айыптаганын белгилеп, Зулушевден маселе боюнча позициясын сураган.
"Кесиптешиңиздер маселени парламенттен көтөрүп, ошол боюнча чек арадан чыгып кетти. Жоопту тактай алганыбыз жок, чыкпаганда тактайт элек. Ошол жерде прокуратура тарабынан 900дөн ашык адам мыйзамсыз жоопкерчиликке тартылганын, 300дөн ашыгы акталганын айтты. Бул фактыларды кайдан алганын такташыбыз керек. Мен тараптан эмне үчүн куугунтук болуп жатканын түшүндүргөн жок. Ага прокурор, прокуратуранын тиешеси жок, сот аркылуу чечилүүдө. Кандайдыр бир тапшырык аткаруу максатында каралап кетти окшойт. Сөзүн кайрадан угуп көрсөңүздөр, фамилиям аталганы менен сөзүнүн мааниси башкача болууда", — деди Зулушев.
Ошондой эле ал жакындарына кылмыш иши козголсо да эч качан кийлигишпегенин, бул мамлекет башчынын талабы экенин кошумчалады.