БИШКЕК, 15-апр. — Sputnik. Израиль Ирандын чабуулуна дүйшөмбү күнү жооп кайтарышы мүмкүндүгүн Wall Street Journal АКШ жана башкы Батыш өлкөлөрүндөгү расмий маалымат булактарына таянып билдиргенин РИА Новости жазды.
"АКШ жана Батыштагы аткаминерлер Израиль Ирандын чабуулдарына тез эле, балким, дүйшөмбүдө жооп кыларын айтууда", — деп жазган басылма.
АКШ президентинин администрациясынын жогорку кызматтагы өкүлү Жозеф Байдендин Израилдин өкмөт башчысы Биньямин Нетаньяху менен сүйлөшүп, Иран боюнча шашылыш реакция жасоодон баш тарттырганга аракет кылганын айтып берген. Анткен менен гезит кайсы аткаминер маалымат бергенин так белгилеген эмес.
"Кыязы, президент (Жозеф Байден – ред.) биздин окуяларды да эсине алып, окуянын өрчүп кетишин жайлатуу үчүн баарын ойлонуп, анан кадам жасоо тууралуу сүйлөштү го деп ойлойм", — деп айтып берген аткаминер.
Буга чейин "Кан 11" телеканалы Израиль Иранга токтоосуз кайра чабуул жасоого даярдыгын, бирок Байден телефон чалган соң операцияны кийинкиге жылдырганын кабарлаган.
Ирандын Ислам революциясынын сакчылар корпусу (куралдуу күчтөрдүн элиталык армиясы) апрель айынын башында Израилдин учактары Сириядагы Иран консулдугун талкалаганына жооп иретинде Израилдин аймагына чабуул жасаганын билдирди. Ар кандай маалымат булактарга ылайык, кол салуу ондон тарта жүзгө чейинки ракеталар жана пилотсуз учуучу аппараттар, анын ичинде Shahed камикадзе дрондору менен коштолгон.
Пентагон Израилди колдой турганын билдирди, ал эми Ирандын БУУдагы миссиясы муну Тегеран менен Тель-Авивдин ортосундагы жаңжал деп атап, Вашингтонду "оолак турууга" чакырды. Ирандын Куралдуу күчтөрүнүн Башкы штабынын башчысы Израилге каршы "Чындык убада" операциясы аяктаганын, Тегеран аны улантууну пландабай турганын билдирген эле. Ал эми Израилдин армиясы жекшембиде өкмөт Ирандын чабуулуна байланыштуу жооп кылчу сокку боюнча чечим кабыл аларын айткан.