БИШКЕК, 15-апр. — Sputnik. Курулуш компанияларын салган турак жайдын беш пайызын Бишкек жана Ош шаарларынын мэриясына акысыз берүүгө милдеттендирүү сунушталууда. Тийиштүү мыйзам долбоорун Жогорку Кеңештин депутаты Балбак Түлөбаев иштеп чыккан.
Демилгечи шаарларда үйү жоктор көбөйүп, келечекте социалдык нааразычылыктар жаралышы мүмкүн экенин белгилөөдө.
"Куруучу компания долбоор кабыл алынгандан кийин эки айдын ичинде республикалык маанидеги шаарлардан каттоодон өтүп, андан кийин батирлердин беш пайызын муниципалитетке өткөрүп, техникалык паспортторду алууга милдеттүү", — деп айтылат мыйзам долбоорунун негиздемесинде.
Мыйзам жер тилкесин убактылуу пайдаланууга алган куруучуларга тиешелүү экени, ал эми мэрия батирлерди муктаждарга акысыз берери айтылган.
Сунуштун ипотекалык турак жайларга тиешеси жок экени кошумчаланды.