Президент Садыр Жапаров Жалал-Абад облустук клиникалык ооруканасынын жаңы имаратын ачты.Мамлекет башчынын маалымат кызматы билдиргендей, имараттын курулушу республикалык бюджеттин эсебинен 2023-жылдын май айында башталган. Үч кабаттуу имарат 100 кишиге ылайыкталган. Анда терапия, неврология жана жасалма бөйрөк бөлүмдөрү жайгашат.Жапаров мамлекет алдын алуу иш-чараларына көңүл буруп, адамдардын ден соолугуна кам көрүп, мындай заманбап медициналык имараттарды курууга милдеттүү экенин баса белгиледи. Анын айтымында, жашоочулар керектүү кызматтардын жана шарттардын толук комплекси менен дарылана алышат жана дарыгерлер заманбап, ыңгайлуу имаратта ишин улантышат.
Ушул жылдын январь-февраль айларында Кыргызстанга сырттан 464 миллион 630 миң доллар которулду. Бул тууралуу Улуттук банктан кабарлашты.Айтылган сумма өткөн жылдын жана 2022-жылдын ушул мезгилдерине салыштырмалуу көп. Бул — акча которуу системалары аркылуу келген жеке тараптардын каражаты. Анын 433,8 миллион доллары Россиядан которулган.
Бишкек шаардык мэриясынын муниципалдык инспекциясы көрктөндүрүү эрежелерин бузган 206 фактыны аныктады. Рейд 1-апрелден 5-апрелге чейин жүргүзүлүп, эреже бузгандарга жалпы 2 миллион 447 миң 500 сом айып салынган. Мэрия бул боюнча тартип орнотуу иштери уланып жатканын белгиледи."Көпчүлүк учурда жеке жана юридикалык жактар унааларды туура эмес токтотуп, жашыл аянтчаларды бузуп, тегерек-четинин абалына көз салбай, курулуш компаниялары асфальт-бетон төшөлмөсүн бузуп жатат. Эреже бузгандар айып пулду өз убагында төлөбөсө ал айыптын үстүнө кошумча айып салынат", — дешти мэриядан.Шаар бийлиги жашоочулардан көрктөндүрүү эрежелерин сактоону өтүнөт.
Үй жандыктары жугуштуу ооруга чалдыкса же күмөнсүү жаралса дароо Ветеринардык кызматтын райондук, шаардык башкармалыктарына же жеке ветеринар адистерине кайрылуу зарыл. Бул тууралуу ведомствонун маалымат кызматы билдирди. Веткызмат жаз келип күн жылыган сайын жапайы жаныбарлардын мал-жандыкка кол салуусу күч аларын эскертет. Мындан улам жаныбарлардан адамдарга жугуучу оорулар да көбөйө баштайт."Ар бир ылаңдын этиологиясына жараша диагностикалык жана профилактикалык эмдөө иштери жүрүп жатат. Эгер жапайы жаныбарлардын, жолбун иттердин мал-жандыкты тиштеп, кол салган учурлары болсо веткызматкерлерге кабарлоону өтүнөбүз. Кайдыгер болбоңуз", — деп айтылат маалыматта. Ошондой эле жолбун иттерди жок кылуу үчүн Веткызмат жергиликтүү өз алдынча башкаруу органдары менен биргеликте иштеп жатканы айтылды.
Бишкекте өтүп жаткан Азия чемпионатында Кыргызстандын эркин күрөш боюнча курама командасы жалпы эсепте 3-орунду ээледи. Бул тууралуу Күрөш федерациясы кабарлады.Курама команда жалпысынан бир алтын, бир күмүш жана экиколо медалга ээболгон. Алтынды 61 килограмм салмакта Тайырбек Жумашбек уулу алса, 125 килограмм салмакта Айаал Лазарев күмүш медаль уткан. Улукбек Жолдошбеков менен Алибек Осмонов коло медаль тагынышкан.Жалпы эсепте 1-орунду Иран, 2-орунду Япония алган.