БИШКЕК, 11-апр. — Sputnik. Бишкекти жылуулук менен камсыздоо боюнча кырдаалды жакшыртуу боюнча кандай чаралар сунушталып жатканын жана алардын айрымдары канчага турарын министрлер кабинетинин төрагасынын орун басары Бакыт Төрөбаев брифингде айтып берди.
Ал Бишкек ТЭЦиндеги авариялык кырдаалдын келип чыгуу себептерин аныктоо жана өлкөнүн жылуулук-энергетика тармагын узак мөөнөттүү өнүктүрүү боюнча сунуштарды иштеп чыгуу боюнча ведомстволор аралык комиссиянын жетекчиси болуп саналат.
Төрөбаев белгилегендей, ТЭЦтин жабдыктары эскирген. Ал эми керектөөчүлөрдүн 85 пайыздан ашыгы же 140 миң абонент ТЭЦ аркылуу жылуулук жана ысык суу менен камсыздалат. Мындан улам эски жабдууларды калыбына келтирүү үчүн төмөнкү иш-аракеттер аткарылышы керек:
Бишкек ТЭЦинде оңдоо-калыбына келтирүү иштерин жүргүзүү жана жабдуулардын техникалык параметрлерин максималдуу стандарттарга жеткирүү;
альтернативдик отун колдонуу менен генерациялоочу станцияларды куруу аркылуу жылуулук электр станцияларындагы жабдууларды модернизациялоо жана реконструкциялоо;
иштеп жаткан "Бишкексельмаш" отканасынын базасында альтернативдик ТЭЦти куруу. Бул үчүн 147 миллион доллар жана ТЭЦ-2ни реконструкциялоого 95-100 миллион доллар керектелет;
борбордун аймагында локалдык отканаларды куруу;
үй чарбаларын ысык суу менен камсыздоо үчүн казан системаларын колдонуу.
Комиссиянын мүчөлөрүнүн бири Болот Ибраев ТЭЦти реконструкциялоо жана модернизациялоо үчүн 150 миллион доллар, ал эми жабдууларды калыбына келтирүүгө жана алмаштырууга 100 миллионго жакын доллар керектелерин билдирди. Учурда инвестиция тартуу иштери жүрүп жатат.
Төрөбаев ТЭЦ-2 жана "Бишкексельмаш" ишканаларынын курулушу, ошондой эле жылуулук борборундагы жогорудагы иш-чаралар бардык керектөөчүлөрдү жылуулук менен камсыздоонун альтернативдүү булагы катары эсептелбей турганын, мында болгону 40 миң гана керектөөчү камтыларын белгиледи.