БИШКЕК, 11-апр. — Sputnik. Министрлер кабинетинин төрагасынын орун басары Бакыт Төрөбаев ТЭЦтеги авариянын себептерин атап, хронологиясын келтирди.
Төрөбаев Бишкек ТЭЦиндеги авариялык кырдаалдын келип чыгуу себептерин аныктоо жана өлкөнүн жылуулук-энергетика тармагын узак мөөнөттүү өнүктүрүү үчүн сунуштарды иштеп чыгуу боюнча ведомстволор аралык комиссиянын жетекчиси болуп саналат.
Анын айтымында, комиссиянын ишинин жүрүшүндө "кырсыктын техникалык себептери аныкталды".
1-февралда энергетикалык объектиде 11 от казан жана 7 турбоагрегат иштеп жаткан. Ал окуянын хронологиясын келтирди:
1-февралда энергетикалык объектиде 11 от казан агрегаты жана 7 турбоагрегат иштеп жаткан;
22:57 (1-февраль) – станциянын нөөмөттөгү жетекчисинин тапшырмасы боюнча №18 от казан агрегаты токтотулган;
бул кадам НЭСКтин борбордук диспетчердик кызматы менен макулдашылган эмес;
02:45 (2-февраль) – нөөмөттөгү жетекчи ошол эле от казан агрегатын кайра иштетүүгө буйрук берген;
02:45тен 02:54кө чейин — оператор от казандын параметрлерин жана казанга аба берүүнү жөнгө салган. Андан кийин №2 газ отун ачып, факелдин жардамы менен казанды күйгүзөт;
02:57 – айдоочу №5 газ күйгүчкө жакындап аны ачат жана иштетүү үчүн факелди киргизет;
02:58 – казандагы басым кескин төмөндөп кетет дагы кезегинде резервде турган №18 тегирменде басым кескин жогорулайт;
02:59 – №18 тегирменде жарылуу болуп, андан кийин № 14, 15, 16, 17, 19 жана 20-казандардан тегирмендеги көмүр массасы чыга баштаган.
Мындан кийин ТЭЦтин эски агрегаты толугу менен өчүрүлгөнүн министрлер кабинетинин төрагасынын орун басары билдирди. Ысык суунун параметрлери кескин төмөндөп 70 градустан 30-40ка чейин жеткен. Шаардын жылуулук менен камсыздоо системасынын ишин сактап калуу үчүн бир катар кичи райондордогу имараттардын жылытуу системалары токтоп, ысык сууну өчүрүү иштери башталган.
Эске салсак, 2-февралда Бишкек ТЭЦинде болгон жарылуудан улам 60 миңге жакын батир ысык суусуз жана жылуулуксуз калган. Кырсыктан беш адам жабыркап, алардын экөө Түркияга дарыланууга жөнөтүлгөн.