Бишкекти жылуулук менен камсыздоо боюнча кырдаалды жакшыртуу боюнча кандай чаралар сунушталып жатканын жана алардын айрымдары канчага турарын министрлер кабинетинин төрагасынын орун басары Бакыт Төрөбаев брифингде айтып берди. Ал Бишкек ТЭЦиндеги авариялык кырдаалдын келип чыгуу себептерин аныктоо жана өлкөнүн жылуулук-энергетика тармагын узак мөөнөттүү өнүктүрүү боюнча сунуштарды иштеп чыгуу боюнча ведомстволор аралык комиссиянын жетекчиси болуп саналат. Төрөбаев белгилегендей, ТЭЦтин жабдыктары эскирген. Ал эми керектөөчүлөрдүн 85 пайыздан ашыгы же 140 миң абонент ТЭЦ аркылуу жылуулук жана ысык суу менен камсыздалат.Комиссиянын мүчөлөрүнүн бири Болот Ибраев ТЭЦти реконструкциялоо жана модернизациялоо үчүн 150 миллион доллар, ал эми жабдууларды калыбына келтирүүгө жана алмаштырууга 100 миллионго жакын доллар керектелерин билдирди. Учурда инвестиция тартуу иштери жүрүп жатат.
Эне жана баланы коргоо улуттук борборунун нейрохирургия бөлүмүндө мээге уникалдуу операция жасалды. Бул тууралуу Саламаттык сактоо министрлигинен билдиришти.Маалыматка ылайык, операцияга академик Миталип Мамытов баштаган нейрохирургия бөлүмүнүн дарыгерлери катышкан. Жалал-Абад облусунан сегиз жаштагы кыздын мээсинин бөлүгүндө көлөмдүү шишик бар экени аныкталган. "Мээнин 4-карынчасынын түбүндөгү шишик тератоманы алып салуу операциясы ийгиликтүү өттү. Тератоманын ичинде бир тутам чач болгон. Ал бала төрөлгөндөн тартып өсүп келген", — деп айтылат маалыматта. Чач кыз төрөлгөндөн бери эле өсүп жатканы белгилүү болду. Анын тамыры түйүлдүк туура эмес өскөндүктөн пайда болгон деген божомол бар. Эгер ал өсө берсе секелектин өмүрүнө коркунуч туудурмактыгы айтылды.
Апрелден тарта республикада аскердик окуу жайларга тапшырууну каалаган абитуриенттердин документтерин кабыл алуу башталды. Ал айдын аягына чейин уланарын Коргоо министрлиги маалымдады. Келечекте аскер кызматкери болууну каалагандар кайда кайрылып, кандай сынактардан өтүшү керектигин министрликтин Аскердик билим берүү жана илим башкармалыгынын башчысы Канагат Уразбеков түшүндүрүп берген. Анын айтымында, өлкөдө Дайыр Асанов атындагы улуттук аскер лицейи жана Калыйнур Үсөнбеков атындагы Аскер институту бул жаатта билим берет. Улуттук аскер лицейине балдар 9-классты аяктап тапшырышат. Анда эки жыл окуган соң орто кесиптик аскердик билимге ээ болушат. Ал эми Калыйнур Үсөнбеков атындагы институт — аскердик жогорку окуу жай. Мында окуу мөөнөтү төрт жыл.
Инфляциянын жогорку чеги артта калды. Бул тууралуу Россиянын Борбордук банкынын төрайымы Эльвира Набиуллина Мамлекеттик Думада окуган докладында айткан. Доклад Россиянын экономикалык абалынын, каржылык рыногунун, төлөм баланстарынын, улуттук төлөм системасынын, ошондой эле Борбордук банктын бир жылдык каржылык отчётунун анализдерин камтыганы айтылат."Борбордук банк негизги ставкасынын көтөрүлүшүнүн алгачкы жыйынтыгын байкай баштады. Инфляциянын жогорку чегинен кайттык", — деген Набиуллина.Анда Борбордук банк жогорку чендеги коюмдар аркылуу жарандардын кирешесин коргой тургандыгы, бул жакырчылык менен күрөшүүгө түздөн-түз таасир берери белгиленет. Июль айынан ноябрга чейин бул көрсөткүч эки сандуу болуп турса, азыр ал 6 пайызга жакындаган.