БИШКЕК, 9-апр. — Sputnik. Россиянын Тергөө комитети "Крокус сити холлдогу" терактыдан кийин Мамлекеттик Думанын депутаттарынын өтүнүчү менен АКШнын жана НАТО өлкөлөрүнүн кызмат адамдары тарабынан террорчулукту каржылоо боюнча кылмыш ишин козгоду. Бул тууралуу Тергөө комитетинин Telegram каналында айтылган.
"Коммерциялык уюмдар, атап айтканда, Украинада иш алып барган "Бурисма холдингс" мунай-газ компаниясы аркылуу алынган каражаттар соңку жылдарда Россияда терактыларды уюштуруу, ошондой эле көрүнүктүү саясий жана коомдук ишмерлерди жок кылып, экономикалык зыян келтирүү үчүн пайдаланылганы аныкталды. Тергөө комитети башка атайын кызматтар жана финансылык чалгындоо органдары менен биргеликте киреше булактарды жана бир нече миллион доллар өлчөмүндөгү акчалардын андан аркы жумшалышын текшерип, Батыш өлкөлөрүндөгү мамлекеттик, коомдук жана коммерциялык уюмдардын кызматкерлери менен конкреттүү бийлик адамдарынын тиешеси каралууда", — деп айтылат билдирүүдө.
Иликтөө жана оперативдүү жолдор аркылуу террордук актылардын түздөн-түз аткаруучулары менен чет элдик кураторлор, уюштуруучулар жана демөөрчүлөрдүн ортосундагы байланыштар такталууда.
"Крокустагы" теракт
Москва облусундагы "Крокус сити холлдун" концерттик залындагы теракт 2024-жылдын 22-мартында кечинде болгон. Имаратка кирип келген куралчандар элге ок жаадырып, имаратка өрт чыгара турган заттарды ыргыткан. Россиянын ӨКМинин маалыматына караганда, кол салуудан 145 адам көз жумду. Алардын арасында балдар да бар.
Тергөө бул каргаша боюнча 11 киши кармалып, алардын ичинен төртөө (Тажикстандын жарандары) терактыны ишке ашырганын айтты. Мындан сырткары, 1-апрелде Дагестанда кылмышкерлерди курал менен камсыздап жана каржылаган төрт чет элдик кармалганы маалымдалган.
Өткөн жумада ФСБ директору Александр Бортников тергөөнүн алгачкы жыйынтыгы кылмыштын изи Украинага барып такалып жатканын билдирген. Россиянын Тергөө комитетинин маалыматына караганда, террорчулар кол салгандан кийин акча алыш үчүн Киевге багыт алган. РФтин атайын кызматы бул каргашанын артында АКШ менен Улуу Британия турганын айтууда.
Теги: Дүйнөдө Крокус Сити Холл Украина теракт АКШ Россия Тергөө комитети