БИШКЕК, 9-апр. — Sputnik. Казакстан менен Россиянын бир катар аймактарындагы суу каптоолор материалдык зыяндан сырткары, адам өмүрүнө да кооптуулук жаратууда.
РИА Новости ӨКМге таянып Курган жана Тюмень облустарында кырдаал кыйын болуп жатканын жазды.
Ал жакта куткаруучулар тобунун иштери арбып, өзгөчө кырдаалдар боюнча ведомствосу күчөтүлгөн тартип менен иштеп жатышат. Министр Александр Куренков абал кыйындаган аймактарды кыдырып жүргөнүн билдиришти.
Оренбург облусунда 10 миңге жакын үйдү суу каптаган, Орск аймагында 2 500гө чукул киши коопсуз жайга көчүрүлүп, психологдор да иштеп жатканы айтылды. Кайгуул кызматтары мародерчулуктун алдын алуу үчүн байкоо салып жүргөнүн билдиришти.
Алтай чөлкөмүндөгү калк жашаган 16 жерде 101 үй менен 282 чарбаны суу каптаган. Убактылуу жайда 20га чукул киши бар экени, абал акырындык менен нугуна түшүп баратканын айтышты. Брянск облусунда жети үйдөн, 90 чарбадан сууну сордуруп чыгышкан. Дагы төрт үй, 342 чарба, төрт жолдун аймагы, эки көпүрө суунун "туткунунда" турат. Самара аймагында 263 турак жай менен 191 чарбадан сууну агызып чыгарышкан. Дагы 50 там, миңге чукул чарба, жети көпүрө, жолдор суу каптаган тейде турат.
Казакстандагы кырдаал
Казакстандын ӨКМи бул күндөрү Акмоло, Караганда, Актөбө, Атырау, Батыш-Казакстан, Костанай, Павлодар, Түндүк-Казакстан облустарында суу ташкындын кесепетин жоюу иштери уланып жатканын билдирди.
Sputnik Казакстан Атырау облусундагы Күлсары калаасында суу алдында калган үйүн карап келебиз деп кеткен ата-бала дайынсыз болуп жатканын жазды. 9-апрелдеги маалыматтарда жалпы узундугу 3 730 метр болгон эл аралык, республикалык жолдордо суу ташкындан улам көйгөйлөр жаралганы айтылды.
Кечээ Акмоло, Актөбө, Атырау, Батыш-Казакстан, Костанай, Павлодар, Түндүк-Казакстан облустарында 3 702 там, 1 822 дача үйлөрү, ар кыл 73 имарат сууда турганын билдиришкен. 155 жолду суу каптаган. 72 284 киши эвакуацияланса, алардын ичинен 17 217 балдар болгон.