"Жеке адамдардын мүлкүн ыктыярдуу легалдаштыруу жана мунапыс берүү жөнүндө" мыйзамы бардык кыргызстандыктарга тиешелүү. Бул тууралуу Асел Абакирова Sputnik Кыргызстан радиосуна маек куруп жатып билдирди.
Анын айтымында, учурда аталган иш-чара мамлекеттик нотариустарда жүргүзүлүүдө.
"Жеке адамдардын мүлкүн ыктыярдуу легалдаштыруу жана мунапыс берүү жөнүндө" мыйзамы кабыл алынып, өлкө башчысы биринчилерден болуп катышып, элге да чакырык таштаган. Учурда аталган кампаниянын алкагында 3000дей кыргызстандык мүлкүн легалдаштырды. Коомчулукта мыйзам мүлкү көп адамдарга гана тиешелүү деп түшүнгөндөр бар. Бирок аталган мыйзам жалпы кыргызстандыктар үчүн иштээрин эскертип кетейин. Кимдин ушул убакка чейин өзүнө катталбаган мүлкү болсо, кампаниянын алкагында өзүнө өткөрүп алса болот. Ага кайдан алып, качан ээ болгондугу тууралуу сурак жүргүзүлбөйт. Учурда республикада 90 мамлекеттик нотариус болсо, ошонун баарында документтер кабыл алынууда. Биз жакында эле бул кампанияга жеке менчик нотариустарды да тартуу боюнча кеңешме өткөрдүк. Жакынкы аралыкта бул маселе чечилсе жеке нотариустар да кампанияга катышып калышы ыктымал. Анда кезек күтүүлөр азайып, кыргызстандыктар үчүн жеңил болуп калат", — деди Абакирова.
Ал мүлктү легалдаштыруу кампаниясы 2024-жылдын 1-июлуна чейин гана жүрөрүн кошумчалады.