БИШКЕК, 8-апр. — Sputnik. Мамлекеттик салык кызматы декларацияны өз убагында тапшырууну эскертти.
Мекеменин маалымат кызматы билдиргендей, 1-майга чейин салык декларациясын төмөнкүлөр тапшырууга милдеттүү:
жеке ишкерлер, анын ичинде патент менен иштегендер;
менчигинде салык салынуучу мүлкү жана жер участогу (короо-жай участкаларынан башка) бар жеке жактар;
юридикалык жак болуп саналбаган дыйкан жана фермердик чарбалар;
мамлекеттик же муниципалдык кызматчы болуп саналбаган, мамлекеттик үлүшү бар уюмдардын жана ишканалардын кызматкерлери;
эл аралык уюмдардагы ишинен киреше алган, жашап турууга укугу же кайрылман статусу бар жарандар;
жыл ичинде 300 миң сомдон ашык суммадагы мүлктү сатып алган жеке жактар.
Толук маалыматты жергиликтүү салык органдарынан, 116 номеринен же Салык кызматынын www.sti.gov.kg сайтынан алууга болот.
Белгилей кетсек, бул — салык декларациясын тапшыруунун экинчи этабы. Биринчи этабы 1-апрелге чейин болуп, анда юридикалык жактар, мамлекеттик жана муниципалдык кызматкерлер тапшырган.