БИШКЕК, 7-апр. — Sputnik. Улуу Британия болушу мүмкүн делген согушка даяр эмес, министрлер кабинетинин айрым мүчөлөрү бункер кайда экенин билбесе да керек. Мындай пикирин өлкөнүн коргоо министринин орун басары Жеймс Хиппи Telegraph гезитине чыккан макаласында билдирди.
Ал дүйнө үчүнчү дүйнөлүк согуштун босогосунда турат дегенге кошулбай турганын, анткен менен министр Грант Шэппстин согуш алдындагы абалда деген пикири менен макул экенин жазган.
"Мен куралдуу күчтөрдүн министри болуп турганда Швециянын жарандык коргонуу министри менен жолуккам. Ал жакта элге согуш чыккан учурда эмне кылуу керектиги, азык-түлүктүн кандай запасы болушу зарылдыгы түшүндүрүлгөн брошюра таратылат экен. Бирөөнү мага да берген, дайым столумдун үстүндө турчу. Ал согуш бүтүндөй элдин көйгөйү экенин эскертип турат. Чынын айтсам, биз бул жаатта өтө эле арттабыз", — деди Хиппи.
Анын айтымында, согушка даярдык абдан көп убакытты алат. Хиппи министрлер кабинетинин көпчүлүк мүчөсү бункер кайда экенин билеринен күмөн санаган.
Белгилей кетсек, акыркы убакта Батышта НАТО менен Россиянын түз кагылышуусу тууралуу байма-бай айтыла баштады. Кремль Россия эч кимге эч кандай кооптуулук жаратпай турганын, ошентсе да анын кызыкчылыгына доо кетире турган аракеттерди көз жаздымда калтырбастыгын айтып келет. Мындан тышкары, Москва батыш чек араларында НАТО катуу активдешип жатканын белгилөөдө. Альянс улам өз чегин кеңейтип, муну "россиялык агрессияны тизгиндөө" деп атап жатат. Кремль НАТОнун Европада күчтөнүп жатканына тынчсыздануусун бир нече ирет билдирген. Ал эми РФ ТИМи Россия альянс менен тең укукта ачык диалогго даяр экенин, бирок Батыш континентти милитаризациялоо багытынан кайтышы керектигин айткан.
РФ президенти Владимир Путин америкалык журналист Такер Карлсон менен маектешип жатып Москванын НАТО өлкөлөрүнө кол салуу ниети жоктугун, мындай аракеттин маани-маңызы болбостугун түшүндүрүп берген. Ал батыш саясатчылары өз калкынын көңүлүн ички маселелерден алагды кылыш үчүн Россиядан келчү кооптуулук менен коркутууну адатка айландырып алышканын белгилеген болчу. Путиндин айтымында, "акыл-эстүү адамдар мындай коркутуп-үркүтүү фейк экенин жакшы түшүнүшөт". Президент Батыш мамлекеттери Россия Украина менен болгон кагылышуусунда стратегиялык жеңилүүгө дуушар болбой турганын акырындан түшүнө баштаганын, андыктан кийинки кадамдары тууралуу ойлонуулары шарт экенин билдирген. Путин Россия диалогго дайым ачык экенин кошумчалаган эле.