Кыргызстанда тоодак таптакыр жоголуп кетүү коркунучунда турат. Тоодак учууга жөндөмдүү ири канаттуу катары эсептелип, адам жашабаган жапайы жаратылышта дың жерлерди байырлайт. Тилекке каршы, браконьерлик кылгандар өсүп, аны өлкө аймагынан табуу кыйын болуп калганын Сейитказы Сагынбаев Sputnik Кыргызстан радиосунун эфиринде маек куруп жатып билдирди.
Анын айтымында, адамдар жапайы канаттуулар байырлаган жерлерге чейин жетип, алардын жашоо ыңгайы бузулуп, аймакты таштап кетүүгө мажбур болууда.
"Кыргызстанда жапайы куштардын 57 түрү Кызыл китепке катталган. Өлкөдө тоодак таптакыр жоголуп кетүү коркунучунда турат. Тоодак учууга жөндөмдүү ири канаттуу катары эсептелип, адам жашабаган жапайы жаратылышта дың жерлерди байырлайт. Тилекке каршы, айдоо жерлер көбөйүп, браконьерлик кылгандар өсүп, аны биздин аймакта табуу кыйын болуп калды. Негизи эле адам буту жеткен жерлердин аянты көбөйүп, жапайы жаныбарлар үчүн кыйын болуп жатат", — деди Сагынбаев.
Ошондой эле адис ак куулар да жоголуп кетүү коркунучунда турганын, бул куштун байыр алуусуна жолтоо болбоо керектигин кошумчалады.