БИШКЕК, 5-апр. — Sputnik. Коррупцияга каршы күрөштөн түшкөн акчанын 21 миллион доллары жаңы футбол стадионун курууга которулду. Бул туурасында Кыргыз футбол союзунун президенти Камчыбек Ташиев билдирди.
Ал бүгүн курулуш иштери жүрүп жаткан жерге барып, журналисттерге маалымат берген.
"Бул стадионду курууга жалпысынан 60 миллион доллар керектелери болжолдонууда. Эки жылдан кийин пайдаланууга берилет. Долбоорун даярдоого Англиядан жана Түркиядан архитектор, адистер келди. Алар Дүйнөлүк футбол федерациясынын стандарты менен курушат", — деди Ташиев.
Арена 45 миң кишиге ылайыкташып, кыргыз боз үйүн элестетет. Ташиев, президенттин тапшырмасына ылайык, Кыргызстандагы бардык стадиондор жаңыртыла турганын кошумчалады.