БИШКЕК, 4-апр. — Sputnik. Россия менен НАТОнун ортосуна атайылап жик салынууда, Вашингтон менен Брюссель диалогдун бардык каналын бөгөп койду. Бул тууралуу РФ тышкы иштер министринин орун басары Александр Грушко маегинде билдиргенин РИА Новости жазды.
"Кырдаал күндөн-күнгө начарлап жатат. НАТО Россияга каршы гибриддик согуш ачты, ал эми Вашингтон сателлиттери менен өз ара кызматташууну биротоло жокко чыгарып, диалогдун бардык каналын бууп койду", — деген дипломат.
Грушко Россиянын альянстын алдындагы туруктуу өкүлчүлүгүндөгү дипломаттары болбогон шылтоо менен үч ирет чыгарылганын да эске салган.
"Мындай кастык мамилеге жооп иретинде Россия 2021-жылы НАТОнун алдындагы өкүлчүлүктөрдүн ишин токтотууну чечкен. Ошол эле маалда НАТОнун Москвадагы аскердик миссияларындагы кызматкерлердин аккредитациялары чакыртып алынып, маалыматтык бюросунун иши токтотулду", — деди ал.
Эскерте кетсек, Түндүк атлантикалык альянс — 1949-жылы 4-апрелде СССР тараптан болчу кооптуулуктан коргонуу максатында Түндүк Америка жана Батыш Европа мамлекеттери тарабынан түзүлгөн аскерий уюм. Башында ага 12 мамлекет: АКШ, Канада, Исландия, Улуу Британия, Бельгия, Нидерланддар, Люксембург, Дания, Италия жана Португалия мүчө болуп кирген.