БИШКЕК, 4-апр. — Sputnik. Нарында дрон чыгарган завод курулат. Бул тууралуу президенттин Нарын облусундагы ыйгарым укуктуу өкүлүнүн маалымат кызматы кабарлады.
Билдирмеге караганда, Бишкекте Кыргызстан менен Кытайдын ишкерлери ортосунда "Кыргызстан – Кытай (СУАР)" бизнес-форуму өтүп, анда энергетика жана тоо-кен тармактары боюнча 1 миллиард 151 миллион доллар суммасындагы жети документке кол коюлган.
"Иш-чаранын алкагында Нарын облусундагы ыйгарым укуктуу өкүлүнүн аппараты менен Кытайдын Zhongtian Zhicontrol Technology Holding Co., Ltd. компаниясынын ортосунда Нарында дрон курап чыгаруучу завод куруу боюнча меморандум түзүлдү", — деп жазылат маалыматта.
Завод жакын арада салынып баштаары кошумчаланды. Бул долбоор "Нарын эркин экономикалык аймагы" менен "Кашгар комплекстүү боналык зонасынын" ортосундагы "Эки өлкө, эки парк" кызматташуу демилгесинин алкагында ишке ашмакчы.