БИШКЕК, 3-апр. — Sputnik. Оштогу мектеп-интернаттарга атайын окуу-усулдук колдонмолор жана балдар үчүн китептер берилди. Бул тууралуу Россиянын Ош шаарындагы илим жана маданият борборунан ("Русский дом") билдиришти.
Маалыматка ылайык, мүмкүнчүлүгү чектелген балдарга ылайыкталган 1 894 китеп Ош шаарындагы №12 мектеп-интернатка жана Кара-Суудагы дүлөйлөр үчүн атайын мектеп-интернатына тапшырылган.
"Китептерди тапшыруу Аутизм жөнүндө маалымат таратуунун дүйнөлүк күнүнө карата уюштурулду. Бул окуу китептер, көркөм адабияттар жана окууга керектүү сөздүктөр мектептерге мурдатан берилген буйрутманын негизинде алып берилди", — деп айтылат маалыматта.
"Русский дом" Кыргызстандын түштүгүндөгү мектептерге 2017-жылдан бери китеп берип келет. Бардык окуу куралдар Билим берүү жана илим министрлиги тарабынан сунушталат.