Кара-Кыргыз автономиялуу облусуна чейин эле 54 жыл бою кыргыздар мамлекеттүүлүгүн түзүүгө аракет кылышканы тууралуу маалымат архивден табылды. Бул тууралуу Каныбек Бокоев Sputnik Кыргызстан радиосуна маек куруп жатып билдирди.
Анын айтымында, 1855-жылы орус падышачылыгына кыргыздын бугу уруусунан да элчилер барып, бирок алар кабыл алынбай кайтып келишкен.
"Кара-Кыргыз автоном облусу түзүлгөнгө чейин 1863-жылы кыргыздын черик уруусунун элчилери орус бийлигине кабыл алынып, падышанын сый белектерин алып, алардын курамына өтүп кайтышкан. Буга чейин тарыхта алгач кыргыздын бугу уруусу Россияга кошулган деп айтылып келген. Бирок чынында бугу уруусунан 1855-жылы барган делегаттар кабыл алынган эмес экен. Бул маалыматтар архивде бар. Ошентип, 54 жылдан соң Кара-Кыргыз автономиялуу облусу түзүлгөн. Башкача айтканда, Кара-Кыргыз автоном облусу, азыркы Кыргыз Республикасынын башаты дей турган болсок, кыргыздар ушул мамлекеттүүлүккө жетүүнү автономиялуу облус түзүлгөнгө чейин 54 жыл мурда эле башташкан. Эмгегинин акыбети кайтып, эч кандай кан төгүүсүз, кагылышсыз эле өз мамлекетин түзүүнүн алгачкы кадамдары жасалган десек болот. Орус аскерлери келип, өз карамагына алган өлкө катары кытай империясы менен чек арасын аныктап, элге оорукана, мектеп куруп, Нарын дарыясына көпүрө салынган", — деди Бокоев.
Ал кыргыздардын орус бийлигине кошулгандан тарта уруу арасындагы кагылыштары токтоп, калктын саны өскөнүн кошумчалады.