БИШКЕК, 2-апр. — Sputnik. Татарстанда дрондор Елабуга жана Нижнекамск шаарларындагы ишканаларга кол салды. Бул тууралуу РИА Новости республика башчысынын маалымат кызматына таянуу менен жазды.
"Эч кандай олуттуу зыян келтирилген жок. Ишканалардын технологиялык процесси үзгүлтүккө учурабады", — деп айтылат билдирүүдө.
Елабугада имараттар ураганда жаракат алгандар болгон.
Аларга тийиштүү жардам көрсөтүлүп, бардык кызматтар күчөтүлгөн режимде иштөөдө.
Республиканын Саламаттык сактоо министрлиги жалпысынан алты адам жабыркаганын билдирди.
"Алардын өмүрүнө жана ден соолугуна эч кандай коркунуч жок. Үчөө дарыгерлердин текшерүүсүнөн кийин үйлөрүнө жөнөтүлдү, дагы үчөө ооруканага жаткырылды", — дешти ведомстводон.
Татарстандын башчысы Рустам Минниханов Транс-Кама чөлкөмүндөгү кырдаал боюнча ыкчам маалымат алууда.
"Учурда сабырдуулукту сактоо өтө маанилүү. Бул кылмышты жасагандар элди дүрбөлөңгө түшүргүсү келет", — деди Минниханов.
"Алабуга" атайын экономикалык аймагынан (АЭА) маалымдалгандай, дрондор АЭАнын жатаканасына тийген.
"Эки адам жаракат алды", — деп жазды аймактын маалымат кызматы.
"Алабуга" АЭАсы Елабугадан 10 чакырым алыстыкта жайгашкан.
Украинанын Куралдуу күчтөрү дээрлик күн сайын учкучсуз учактардын жардамы менен Россиянын чек арасына жана борбордук аймактарына чабуул жасоого аракет кылууда. Аларды абадан коргонуу системалары убагында жок кылып жатат. Чек ара аймактарында террордук коркунучтун деңгээли жогору деп бааланууда.