Мектепке даярдоо бала бакчаларга өтүп, нөлүнчү класстар биринчи болуп өзгөрөт. Натыйжада мектептер 12 жылдык окуу моделине өтөт. Бул тууралуу Догдуркүл Кендирбаева Sputnik Кыргызстан радиосунда маек куруп жатып билдирди.
Анын айтымында, 12 жылдык окутуу модели дүйнөнүн 155 өлкөсүндө кирген.
"Билим берүү тармагында реформа ЖРТ киргенде, анан нөлүнчү класстар ачылганда болгон. Калгандары фрагменталдуу болуп, кайсы бир региондо же пилоттук түрдө жасалган өзгөртүүлөр. Ал эми учурда сунушталган "Алтын казык" программасы аталган тармакты толугу менен комплекстүү өзгөртөт. Анда бала бакчалар көбүрөөк баланы камтып, мектептер 12 жылдык окуу моделине өтөт. Мындан тышкары, Сингапурдун билим берүү стандарттарында жазылган 46 аталыштагы окуу китептери алынат. Ошондой эле башкарууну, жалпы эле билим берүү мекемелерин оптималдаштыруу максатталууда. 12 жылдык окуу модели дүйнөнүн 155 өлкөсүндө колдонулат. Демек, биздин балдар глобалдык эмгек рыногунда атаандаштыкка туруштук бере ала тургандай даярдалат. Муну менен бирге окуучуларга кесиптик багыт берүү киргизилет. Азыркы тапта 157 миң бала 1-класска бара турган болсо, анын 120 миңи нөлүнчү класстан даярдыктан өтөт. Ал эми 26 миң бөбөк бала бакчадан келип кошулат. Болжол менен 20 пайыздайы эч жакка барбай калууда. 12 жылдык окууга өткөндө бардык балдар камтылат. Ал эми мектепке даярдоо толугу менен мектепке чейинки билим берүүгө өтөт. Учурда кыска мөөнөттөгү 560 өнүктүрүү борбору даярдалууда. Алар 40 миң баланы мектепке чейинки билим берүүгө тартууга жол ачат. Ошондой эле бала бакчаларда 2 600 класс түзүлүп, 60 миң баланы окутат. Ал эми бала бакчаларды көбөйтүү үчүн бардык аракеттер көрүлүп, тийиштүү жеңилдиктер берилди. Ошондо мектепке даярдоо бала бакчаларга өтөт. Ал эми учурдагы нөлүнчү класстар биринчи класс болуп калат. Бул шартта бала азыркыдай эле 17-18 жашында мектепти аяктайт", — деди Кендирбаева.
Ошондой эле ал коомчулук кооптонуп, ата-эне балдарынын билимине түпөйүл болуп жатканы кадыресе көрүнүш экенин кошумчалады.