Адис лапароскопия же эндовидеохирургия атайын видеокамера, экран жана инструменттердин жардамы менен жасалуучу операция экенин белгиледи. Мында бычак колдонулбайт, кишинин денеси чоң кесилбейт. Бирок ошол инструменттердин көлөмүндө тешилип, жумшак инструменттер адамдын жабыркаган жерине киргизилип операция жасалат.
"Лапароскопия же эндовидеохирургия менен дүйнө жүзүндө операциянын 98 пайызы жасалат. Мисалы, бир бейтаптын бөйрөгүнө же ашказанына операция жасасаңыз, ал чоң кесик болгону үчүн ооруканада көпкө чейин жатат. Көптөгөн дары-дармекти колдонот. Ал эми лапароскопия жолу менен операция жасалганда тешик кичинекей болгону үчүн адамдын калыбына келиши эки эсе бат болот", — деп түшүндүрдү Токтогазиев.
Мындан тышкары, ал өмүрүнө кол салып, уксус ичип алган адамдар тарткан азаптарды баяндады. Айтымында, кызыл өңгөчү, кээде ичегилери кошо кислотага күйүп кеткендер келет. Мындайда эндовидеохирургдар кызыл өңгөчтү алып салып, жоон ичеги же ашказандан кызыл өңгөч жасашарын түшүндүрдү.
Токтогазиев көлөмү өтө чоңоюп кеткен миома кантип алынарын, нан, камыр жей берип ичегилерин чоюп алган адамдар тарткан түйшүктөрдү да айтып, элди ден соолукка кам көрүүгө чакырды.