БИШКЕК, 28-мар. — Sputnik. Россия НАТО менен согушууну каалайт деген сөздөр айныгандык, себеби аскердик чыгымдардын айырмасы асман менен жердей. Бул тууралуу РФ лидери Владимир Путиндин айтканын РИА Новости жазды.
Мамлекеттин башчысы Торжок шаарында (Тверь облусу) аскердик учкучтар менен жолугуп, сүйлөшкөн.
"2022-жылы АКШ (аскердик чыгымдар — ред.), эгер жаңылбасам, 811 миллиард доллар короткон, ал эми Россия Федерациясы 72 миллиард доллар. Ушундай айырмачылык барда НАТО менен согушканы жатабызбы? Бул айткандары эми айныгандык да", — деген Путин.
Ал Батыш бийлиги Украинага F-16 истребителдерин берген күндө да согуш талаасындагы абалга таасир эте албай тургандыгын айткан.
"F-16ларды бергенде да бул кырдаал согуш талаасындагы абалды өзгөртө албастыгын силер башкалардан да жакшы түшүнөсүңөр", — деген Путин алар менен сүйлөшүп жатып.
Президент истребителдер үчүнчү мамлекеттердин аймагынан учуп чыккан күндө да Россиянын мыйзамдуу бутасына айланарын баса белгилеген. Мындан сырткары, F-16ларды Батыш Киевге берген техникалардыкындай тагдыр күтүп турганын, Россия аларды атып түшүрөрүн айткан.
"Танкаларды, сооттолгон машиналарды, залптык системаларын жана башка техникаларды жок кылган сымал алардын учактарын да жок кылабыз. Албетте, үчүнчү өлкөлөрдүн аэродромдорун колдонот, алар кайдан учуп чыкса да баары бир биздин мыйзамдуу бутага айланат", — деп кошумчалаган президент.