БИШКЕК, 28-мар. — Sputnik. Ысык-Көл облусунун Чырпыкты айылында болгон жол кырсыгынан Ысык-Көл райондук Санэпидборбордун башкы дарыгери, жолдошу жана айдоочусу каза болгонун аталган борбор тастыктады.
Эске салсак, үрөй учурган жол кырсыгы кечээ, 27-мартта, Балыкчы — Ананьево — Каракол жолунда болгон. Анда Санэпидемборбордун кызматтык унаасы менен Daimler-Chrysler D312 үлгүсүндөгү автокөлүк кагышып, үч адамдын өмүрү кыйылган.
"Санэпидборбордун башкы дарыгери Алина Токтоназарова жумушу боюнча Чолпон-Атадан Балыкчыга чогулушка бара жатып кырсыктаган. Маркум 52 жашта болчу, бул тармакта 26 жылдан бери иштеп келе жаткан. Райондук санэпидборборун 2021-жылдан тарта башкарып турган", — деп жазылат маалыматта.
Унаанын ичинде башкы дарыгердин күйөөсү да болгону айтылды. Айдоочу үчөө кырсык болгон жерде үзүлгөн. Учурда жол кырсыгы боюнча тергөө иштери жүрүп жатат.