БИШКЕК, 28-мар. — Sputnik. Балыкчыда кызды коюп кетти деп шектелген адамга карата кылмыш иши токтотулганын Ысык-Көл облусунун сотунан кабарлашты.
Билдирмеге караганда, тараптардын жарашуусуна байланыштуу Балыкчы шаардык сотунун чечими менен иш кыскартылган.
"Бул иште жарашуу боюнча келишим бар. Мындан тышкары, жабыркаган тарап жеке, ачык айыптоодон баш тарткандыгына байланыштуу кылмыш ишин токтотуу тууралуу өтүнүч менен кайрылган. Бектур Осмонбаев анча оор эмес кылмыштар боюнча айыпталып, баш коргоо чарасы сыртка чыкпоо тил катына өзгөртүлдү" — деди соттон.
Эске салсак, жол кырсыгы 2024-жылдын 26-январында болгон. Анда Geely Monjaro үлгүсүндөгү автоунаанын айдоочусу 11 жаштагы кызды сүзүп кеткен. Транспорт Балыкчы шаардык ички иштер башкармалыгына таандык экени такталган. Окуя чуу жаратып, кыздын атасы видеокайрылуусунда кырсыкка шаардык милициянын жетекчилеринин бири күнөөлүү экенин айтып чыккан. ИИМ кызматтык иликтөө жүргүзүп, жыйынтыгында рулда болгом деген аймактык тескөөчү менен шаардык милициянын башчысы болуп иштеген агасын иштен алган. Алар Кылмыш-жаза кодексинин 144-беренеси ("Коркунучта калтыруу - этиятсыздыктан ден соолукка оор залал келтирген жосун") жана 312-беренеси ("Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу - этиятсыздыктан ден соолугуна оор залал келтирген ошол эле жосун") боюнча айыпталып, кармалган.
Жабыркаган кыз Бишкектеги ооруканада дарыланып, атасы тосмо арыз жазганы да айтылган. Кийин башкы прокурор Курманкул Зулушев кызды сүзүп кеткен адам мыйзам чегинде жазаланарын убадалаган.