БИШКЕК, 27-мар. — Sputnik. Бүгүн Нарын облусунда "Агро – 2024" айыл чарба форуму өттү.
Анын алкагында азык-түлүк жарманкеси уюштурулуп, айыл өкмөттөргө техникалар берилди.
Форумдун максаты — дыйкан-фермерлерге, багбандарга жаңы ыкмалар тууралуу кеп-кеңештерди берүү менен айыл чарбасын өнүктүрүүгө жол ачуу.
Иш-чарага Айыл чарба министрлигинен келген өкүлдөр, мамлекеттик жана коомдук уюмдардын адистери, дыйкан, фермерлер катышты.
Бир катар адистер ирригация, ветеринария тармагындагы реформалар, сүт жана мөмө-жемиш кластерин түзүү, мөмө-жемиш өсүмдүктөрүн отургузуунун пайдасы жана ыкмалары боюнча баяндамаларды жасашты.