БИШКЕК, 27-мар. — Sputnik. Мамлекеттик Дума "Крокус сити холл" имаратынан элди сыртка алып чыгууга жардам берип, эрдик көрсөткөн өспүрүмдөрдү сыйлаганын РИА Новости жазды.
Ага ылайык, Мамдумада үй-бүлөнү коргоо боюнча комитеттин төрайымы Нина Останина Никита Иванов, Ислам Халилов, Артемий Филимонов, Виктория Волчихина, Александр Журик жана Елизавета Тереховага ноутбук белек кылган. Вице-спикер Анна Кузнецова аларга Ыраазычылык кат тапшырса, депутат Яна Лантратова Мамлекеттик Думанын белгилери бар калем сап жана күндөлүк тараткан. Ошондой эле балдарга Россия тууралуу китеп ыйгарылган. Эске салсак, Ислам Халиловдун ата-энеси Кыргызстандан. 15 жаштагы өспүрүм теракт учурунда имараттан 100дөй адамды сыртка аман-эсен алып чыккан.
Москва облусуна караган Красногорск шаарындагы "Крокус сити холл" концерттик залында теракт 22-мартта кечинде болгон. Тергөө комитетинин маалыматына караганда, кол салуудан 139 адам каза болуп, 182 киши жабыркаган. Бул ишке шектелип сегиз адам камакка алынды.