БИШКЕК, 27-мар. — Sputnik. Жаз келип, күн чыгары менен көпчүлүк баш кийимди чечип салат. Абанын температурасы жылый электе баш кийим кийбей коюунун зыяны тууралуу терапевт Людмила Лапа Sputnik радиосуна айтып берди.
Айтымында, жазгы күн жылуудай сезиле бергени менен суук толук кете элек болот. Өзгөчө башты жууп, чачты толук кургатпай сыртка чыгып кетүү ооруларга кептейт.
"Башта анын ичиндеги органдарды коргоочу бир да катмар жок. Теринин астында май да болбойт, тери, андан кийин эле чач. Демек, сууктан коргой албайт. Чач суу болсо башка эки эсе суук өтөт. Мындан улам мурун, тамактагы былжыр челдер сезгенет. Курч респиратордук вирустук инфекция, гайморит жана башка оорулар козголот. Мындай жагдай көп кайталанса адам менингит өңдүү олуттуу ооруларга да кептелиши мүмкүн", — деп эскертти Лапа.
Дарыгер көп учурда оорунун келип чыгышы адамдын иммундук системасынан, организминин абалынан көз каранды экенин айтат. Эгерде өнөкөт оорусу, инфекциясы бар киши үшүп калса дароо оорусу козголот.
"Ошондуктан суук кеткенче башты жылуу кармоо сунушталат. Ал эми ным чач менен сыртка абанын температурасы 24 градустан жогору болгондо чыкса болот", — деген адис.