"Президенттин жарлыгы менен судья жана сот кызматкерлеринин маянасы 100 пайыз көтөрүлдү. Маянанын жогору болушу соттордун адилет, калыс чечим чыгаруусуна тоскоолдуктардын бирин жоет. Мындан тышкары, соттор республика боюнча ротацияланууда. Бир райондо 10-15 жылга чейин иштеген соттор болгон. Ошондуктан 2022-жылы жалпы 312 судья бир аймактан башка регионго которулду. Бул дагы өз кезегинде жакшы натыйжасын берет. Маани бере турган бир жагдай бар, сот — акыркы инстанция. Ага чейин иш тергөөчү, айыптоочулардан өтүп, ошолордун документтеринин негизинде сот өкүм чыгарат. Демек, соттук чечимдер боюнча жалгыз эле сотторду сындай берген туура эмес. Буга катышкан бардык органдардын ишин системалуу жакшыртуу зарыл. Муну менен бирге былтыр сегиз судья ээлеген кызматынан мөөнөтүнөн мурда бошотулуп, үчөө эскертүү, жети судья алдын ала эскертүү алган. Туура эмес чечим чыгарганын моюндап, өз арызы менен иштен кеткендери дагы жок эмес", — деди Даутов.