Кыргыз жеңил өнөр жай тармагынын имиджин көтөрүү зарыл. Ал үчүн комплекстүү иштерди жасоо керек. Мындай пикирин Зафарбек Сулайманов Sputnik Кыргызстан радиосуна маек куруп жатып билдирди.
Анын айтымында, аталган тармактын мыйзам талаасында иштөөсүнө шарт түзүү менен талапты да күчөтүү зарыл.
"Азыр кыргыз жеңил өнөр жайы экономкласстагы рынокко иштейт. Бул багытта продукция чыгарууда өндүрүштүн көлөмү чоң болгону менен кирешеси анчейин деле көп боло бербейт. Мисал үчүн башка мамлекеттерге барып, биздин тикмечилик тууралуу сөз кыла турган болсок, алар Кыргызстан жеңил өнөр жайы жөнүндө кабары жок экенин айтышат. Ошол эле учурда жаныбыздагы өзбек текстилин таанышат. Андыктан биз массалык өндүрүшкө басым жасабай кыргыз жеңил өнөр жайынын имиджин түзүп, деңгээлин көтөрүүгө мезгил келип жетти. Ал үчүн биринчи кезекте ишкерлер мыйзам алкагында иштөөдөн качпашы керек. Муну бийлик талап кылуусу зарыл. Ошо менен катар өкмөт субсидияларды берип, ар тараптуу колдоо көрсөтүүсү зарыл", — деди Сулайманов.
Ал тигүүчүлөрдүн квалификациясын жогорулатуу заман талабы болуп турганын кошумчалады.