Манаста "арып" деген көөнө сөз кездешет. Ал эпосто кеминде үч маанини түшүндүрөт. Бул тууралуу Нурбек Талантбеков Sputnik Кыргызстан радиосунун "Көөнө сөз" рубрикасында билдирди.
Анын айтымында, бул сөздүн айрым маанилери учурда деле колдонулат.
"Манаста "арып" деген сөз көп кездешет. Айрыкча сыйкырдуу дүйнө менен байланышкан окуялардан учуратууга болот. Бул сөздү учурда деле байма-бай колдонгон кездер бар. Бирок айрымдар маани-маңызын түшүнбөшү ыктымал. Анын биринчи мааниси "арип" делип — тамга, экинчи маанисинде — айла-амал, үчүнчүсү сыйкыр, дуба дегенди туюндурат. Мисалы, эпосто:
"Эркектен бирди тубары,
Эл бийлеп эсен турары,
Төлгөсүнөн билинди,
Артык, арып, арамал,
Аруукеден билинди,
Эркек төрөйт дегенде,
Эр Алмандын боору тилинди" деген саптар кездешет. Бул Бээжинге аттанууда Алманбеттин жубайы үч айлык боюнда бар экенин укканын сүрөттөгөн жери", — деди Талантбеков.
Манасчы көөнө сөздөр тилдин байлыгы экенин кошумчалады.