БИШКЕК, 22-мар. — Sputnik. Күнүмдүк тамактанууга витамин, минерал жана клетчаткага бай азыктарды сөзсүз түрдө колдонуу керек. Бул тууралуу дарыгер Дебора Ли айтканын "Доктор Питер" басылмасы жазды.
Адистин айтымында, рациондо төмөнкү үч азык ар дайым болушу зарыл.
Брюссель капустасы
Капустанын бул түрү стресс менен өнөкөт ооруларды алдын ала турган антиоксиданттарга бай. Дарыгер азыкты үзбөй жегенде рактын өрчүшүн басаңдатууга болорун айткан. Адис брюссель капустасын жумасына эки-үч жолу 80 граммдан жеп турууну сунуштайт. Бирок андан көп жегенге болбойт, себеби ичти көптүрүшү мүмкүн.
Шпинат
Шпинат — темир менен магнийдин булагы. Анын курамында ошондой эле калий, лютеин жана антиоксиданттар бар. Алар өнөкөт оорулардан сактап, мээнин иштешине жардам берет. Мындан тышкары, шпинаттагы А, С жана К витаминдери иммунитетти көтөрөт. Адис бул азыкты жумасына эки-үч жолу эки аш кашык жеп турууну сунуштайт. Мында да аша чаап кетпеш керек, шпинатты көп жеп алганда ич ооруйт. Бөйрөгүндө ташы барларга сунушталбайт.
Баклажан
Рактан оолак болууга жардам берген азык. Курамында антоциан бар. Ал өз кезегинде жүрөк-кан тамыр ооруларын алдын алат. Ошондой эле андагы хлороген кислотасы холестеринди төмөндөтөт. Дарыгер баклажандын үчтөн бир бөлүгүн күндө жеп турууну сунуштайт. Бирок ашказан жарасы, гастрит менен жабыркагандарга жегенге болбойт.