БИШКЕК, 20-мар. — Sputnik. Садыр Жапаров жана кытайлык China State Railway Group Co., Ltd. компаниясынын башкы директорунун орун басары Ван Тунцзюн бүгүн, 20-мартта, Кытай — Кыргызстан — Өзбекстан темир жолун куруу долбоорун ишке ашырууну талкуулады. Бул тууралуу мамлекет башчынын маалымат кызматы билдирди.
Ван Тунцзюн менен жолугушууда өлкө президенти кыргыз тарап КЭРдин төрагасы Си Цзиньпиндин "Бир алкак, бир жол" демилгесин толугу менен колдой турганын белгилеп, бул анын алкагындагы эң ири транспорттук долбоор болуп саналарын айткан.
Жапаров темир жол Кытай менен Борбор Азия өлкөлөрүн байланыштырып, Европа менен Перс булуңуна жаңы транспорттук каттамдарды ачарын белгиледи. Ал Кыргызстан жакынкы бир нече жылда бул жолду курууга ниеттенип жатканын кошумчалады.
Анын айтымында, учурда тараптар долбоорду ишке ашыруу механизми боюнча бирдиктүү пикирге келишти. Тактап айтканда, темир жол куруу боюнча биргелешкен үч тараптуу компания түзүү пландалууда.
Тунцзюн тараптар бул аймактык долбоордун маанилүүлүгүн эске алуу менен аны ишке ашыруу процедураларын тездетүүгө даяр экендигин айтты. Ошондой эле долбоордун техникалык-экономикалык негиздемесин иштеп чыгууну жана бекитүүнү тездетүүгө жана тиешелүү келишимге кол коюуга даяр экени белгиленди.