БИШКЕК, 19-мар. — Sputnik. Президент Садыр Жапаров Чүй облусунун Сокулук районундагы көчмө клиниканын иши менен пландан тышкары таанышты. Бул тууралуу өлкө башчынын маалымат кызматы билдирди.
Мобилдик клиникадан бейтаптар акысыз текшерүүдөн өтүп, ар кандай оорулардын диагностикасы жана медициналык текшерүүлөрдүн кеңири спектри боюнча кеңеш ала алышат.
Диагностикалык комплекс Сокулук районунда үч ай иштеп, андан соң Нарын облусуна жөнөйт. Буга чейин Кыргызстандын түштүк аймактарынын тургундары мобилдик клиникада текшерилишкен.
Президент медициналык-социалдык кызмат көрсөтүү маселелерин көтөргөн жарандар менен баарлашты. Ал быйылкы жылы бөйрөк алмаштырууга муктаж болгон кыргызстандыктарга мамлекеттик бюджеттин эсебинен операциялар жүргүзүлө баштаганын эске салды.
"Ар бир операцияга жети миң доллардан бөлүнгөн. Кийинки этапта боор, жүрөк жана жилик чучугу алмаштырыла баштайт", — деп айтылат маалыматта.
Мобилдик клиника долбоору беш жылга эсептелген. Комплексте дарыгерлердин кабинеттери, лаборатория, операциялык бөлүм, көчмө скрининг борбору жана башкаруу борбору бар. Анда компьютердик томография, маммограф, рентген аппараты жана гастроскоп камтылган. Ошондой эле клиникада бейтаптарды ташуу үчүн кичи автобустар, анын ичинде тез жардам унаасы бар.