БИШКЕК, 19-мар. — Sputnik. Убагында биз дагы митингдерди уюштурганбыз. Бирок жеке кызыкчылыгыбыз үчүн эмес, "Кумтөр" элибиздин кызыкчылыгына иштесин дегенбиз. Бул тууралуу президент Садыр Жапаров "Кабардагы" маегинде билдирди.
Ага журналист "митингге чыккандардын башынан сылап отурбайбыз, жооп катуу болот" деп айттыңыз эле. Буга убагында сиз деле "Кумтөр" деп митингдерди уюштуруп жүргөнүңүздү эске салгандар болууда" деп кайрылган.
Өлкө башчы убагында митингдерге чыкканын танбай турганын белгиледи.
"Ооба. Убагында биз да митингдерди уюштурганбыз. Бирок биздин пайдабызга чечилип жаткан жакшы иштерди бурмалап, жеке кызыкчылыгыбыз үчүн митинг уюштурган эмеспиз. "Кумтөр" элибиздин кызыкчылыгына иштесин, казынадан суук колуңарды тарткыла, элибиздин жашоосун оңдогула" деп митинг уюштурчубуз. "Кумтөрдү" алдык. 30 миллиард сомго жакын салык төгүп жатат. Андан сырткары, 30 миллиард сомго жакын таза киреше берип жатат. Мурда биздин пайдабызга 5 миллиард сом салыктан башка койдун корголу жок болчу. Бюджет дээрлик үч эсеге көтөрүлдү. Салык, бажы системасындагы уурулукту дээрлик 90 пайызга жок кылдык. Армиябызды, күч түзүмдөрүн болуп көрбөгөндөй күчтөдүк. Мектеп, жол, бала бакчалар салынып жатат. Түшкө кирбеген мегадолбоорлор башталды. ГЭСтер, ишканалар, маданий жана социалдык объектилер курулууда. Ортолоп калган долбоорлор, башталып жаткандары бар. Алар улам ишке бериле баштайт. Жылдан-жылга алар жемишин берип, экономикабыз мындан дагы күчтөнөт. Эмгек маяналар, пенсия, жөлөк пулдар дагы жогорулайт", — деди Жапаров.
Президент калктын жашоо-турмушу дагы жакшырарын белгиледи.
"Кара жаныбызды карч уруп, эл үчүн иштеп жатабыз. Анан эмнеге митингге чыгышыңар керек? Мурдагыдай 200 эле киши жалпы элдин ырыскысын уурдап жашаган жашообуз жакшы экен деппи? Биз андайларга жол бербейбиз. Мен бул сөзүм менен коркуткан жокмун. Укуктарын да чектебейм. Жөн гана 200 коррупционер менен бийликке таарынган уурулардын, кызматынан ажырагандардын кызыкчылыгын эмес, 7,5 миллион элдин, мамлекеттин кызыкчылыгын биринчи орунга коём. Коргойм. Бул — менин эл ишенип добуш берген түздөн-түз милдетим", — деди ал.
Өлкө башчыга камактагы жаран Мелис Аспековдун "Садыр Жапаров убагында Райым Матраимовдон акча алган" деген каты боюнча дагы суроо узатылган. Буга ал "былжырак жалганчылар үчүн жооп бергенге убактым да жок" деп жооп берди.