БИШКЕК, 19-мар. — Sputnik. Кара-Балта шаарындагы "Жунда" мунай заводунда болгон министрлер кабинетинин төрагасы Акылбек Жапаров тиешелүү жактарга объектини ишке киргизүүгө колдоо көрсөтүүнү тапшырды.
Өкмөттүн маалымат кызматы Жапаров Чүй облусун кыдырганын, анын ичинде аталган заводдун ишмердүүлүгү менен таанышканын жазды.
Белгилей кетсек, өткөн жылдын ноябрь айында ишканада капиталдык оңдоо иштери башталган. Аны модернизациялоо жана мурдагы кубаттуулукта ишке киргизүү 2024-жылдын II кварталына болжолдонууда.
Министрлер кабинетинин жетекчиси заводдогу оңдоо иштеринин жүрүшүн көрүп, өндүрүштүк мүмкүнчүлүктөрү, нефтини кайра иштетүү тармагын өнүктүрүүнүн келечеги боюнча маалымат алган.
"Жапаров тиешелүү түзүмдөргө заводдун потенциалын, жумуш орундарын жана өлкөнүн экономикасын өнүктүрүүгө кошкон салымын эске алуу менен ишкананы ийгиликтүү ишке киргизүүгө колдоо көрсөтүүнү тапшырды", — деп билдиришти маалымат кызматынан.