БИШКЕК, 17-мар. — Sputnik. Президент Садыр Жапаров Аксы окуясын эскерүү күнүнө карата кыргызстандыктарга кайрылуу жасады.
Мындан туура 22 жыл мурун авторитардык бийликке каршы жалпы элдин козголуусуна түрткү берген окуя катары Кыргызстандын соңку тарыхында кара тамга менен жазылып калганын белгиледи.
"Ар жылы ушул күнү текебер бийликтин колунан каза тапкан чыныгы эр-азаматтарды эскерип келебиз. Бабалар мурас кылган эркиндик үчүн кандан-бектен кайра тартпаган, тизе бүгүп баш ийбеген, эл-журттун эртеңки келечеги үчүн жан берген атуулдардын элеси эсибизде түбөлүккө сакталат. Кыргызстандын бүтүндүгү, элдин эркиндиги, демократиялык ачык-айкын өлкөнүн келечеги үчүн өз жанын аябаган аксылыктардын эрдигине таазим кылабыз! Аксы окуясынын каармандары тарыхый бурулуш катары чоң сабак калтырышты", — деди Жапаров.
Ошондой эле президент бул трагедиядан азыркы жана келечектеги муун сабак алып, бакубат жашоого умтулат деген ишенимин билдирди.
"Биз Аксы окуясын жадыбыздан чыгарбай, элдин үмүт-тилегин аткаруу үчүн жан үрөп иштөөдөбүз. Жаркын келечекке багыт алып, өнүккөн мамлекетти куруудагы аракетибизден талбайлы. Баарыбыз ынтымакта жашап, жаштарыбызга туура таалим-тарбия берип, өлкөбүздүн алдыга карай өнүгүүсүнө салым кошолу. Ошондо гана биз чындык үчүн курман болгондордун алдында жүзүбүз жарык болот!" — деди президент.
Соңунда мамлекет башчы Кыргызстанда туруктуулук өкүм сүрүп, ар дайым тынчтык болушун тиледи.
Жалал-Абад облусунун Аксы районунда 2002-жылы 17-мартта жергиликтүү эл нааразычылык акциясына чыккан. Алар камакка алынган Жогорку Кеңештин депутаты Азимбек Бекназаровду бошотуу жана Үзөңгү-Куушту Кытайга бербөө талабын коюшкан. Демонстранттарды токтотуу үчүн Боспиекте тартип коргоо кызматкерлери күч колдонуп, ок чыгарып, анын кесепетинен алты адам каза болуп, бир нечеси ур-токмокко алынган. Бул боюнча тартип коргоо органдары тарабынан атайын "Тайфун" операциясы уюштурулган.