БИШКЕК, 17-мар. — Sputnik. Франция президенти Эммануэль Макрон Le Parisien басылмасына маек куруп жатып Украинада "россиялык аскерлерге каршы туруу" үчүн операция жүргүзүү ыктымалдыгын жокко чыгарбай турганын билдирди. Бул тууралуу РИА Новости жазды.
"Албетте, мен муну каалабайм жана эч качан демилгелебейм, бирок качандыр бир кезде россиялык аскерлерге каршы туруу үчүн ошол аймактарда операция жүргүзүүгө туура келиши мүмкүн", — деген Макрон.
Анын айтымында, "Франция муну жасай алат", "өлкөнүн күчү да ушунда".
Эскерте кетсек, февралдын соңунда Макрон Россия "бул согуштан жеңип чыкпашы үчүн" Париж колунан келгендин баарын жасай турганын жар салган. Анын айтымында, Батыш мамлекеттеринин лидерлери Украинага аскер жөнөтүү мүмкүнчүлүгүн талкуулаган, бирок бир пикирге келишкен эмес. Билдирүүсү кескин сынга кабылган саясатчы кийинчерээк сөзүнүн баарын дыкат ойлонуп туруп айтканын белгилеген эле. Марттын башында Макрон оппозиция лидерлери менен жолугушканда Франциянын Украинага жардам көрсөтүү боюнча "эч кандай чектөөсү жана кызыл чийини жок" экенин билдирген.
Бейшемби күнү France 2 телеканалына берген маегинде Макрон Париж Украинада согуштук аракеттердин демилгечиси болбой турганын, анткен менен учурдагы жаңжал Европа менен Франция үчүн экзистенциялык мааниге ээ экенине токтолгон. Макрондун айтымында, Украинанын "эл аралык коомчулук Крым менен кошо тааныган чек арасы кайтарылмайынча" континентте тынчтыкта жашоо мүмкүн эмес.
Франция президентинин Украинага аскер жөнөтүү боюнча билдирүүсүнө комментарий берип жатып Кремль окуянын мындай өңүтү Россия менен НАТОнун түз аскердик кагылышуусуна кептей турганын билдирген. РФ президентинин маалымат катчысы Дмитрий Песков "айрым континентти Украинага жөнөтүү" ыктымалдыгынын талкууланышынын өзү жаңы элемент деген.
Президент Владимир Путин европалык контингенттин кириши согуш талаасындагы кырдаалды өзгөртө албастыгын, мындан украин бийлиги гана жабыр тарта турганын эскертип, "кызыл чийини" жок өлкөлөргө Россиянын да мамилеси так өзүндөй болорун белгилеген.