БИШКЕК, 17-мар. — Sputnik. Француз аскерлерин Украинага жөнөтүү идеясы Эммануэль Макрон менен Владимир Зеленскийге кокаиндин таасири астында гана келиши мүмкүн. Ошондуктан алар аны колдонууну таптакыр токтотушу керек. Бул тууралуу РФтеги президенттик шайлоонун Херсон облусундагы франциялык байкоочусу Кристиан Ро билдиргенин РИА Новости жазды.
"Зеленский менен Макрон кокаинди колдонууну токтотушу керек деп эсептейм. Анткени биздин президент Франциянын эле эмес, башка мамлекеттердин да коркунучтуу түшүнө айланды. Мен анын АКШга кызмат кылууга аргасыз экенин түшүнөм, бирок баары чеги менен болушу керек", — деди Ро.
Байкоочунун айтымында, Макрон өлкө армиясын Украинага жөнөтүүнү сунуштаганда франциялыктар аны шылдыңга алган.
"Ал эми немецтер "Париж коопсуз, тынч жер, Россияга согуш жарыялай тургудай сен кимсиң?" дешти", — деген эксперт.
Россия Федерациясынын Херсон аймагындагы шайлоого Алжирден, Ботсванадан, Германиядан, Замбиядан, Индонезиядан, Мексикадан, АКШдан, Франциядан жана Түштүк Африкадан 10 адамдан турган чет элдик байкоочулар тобу барган. Алар ишин 15-мартта башташкан жана добуш берүүнүн үч күнүнө тең катышат.
Эске салсак, 26-февралда Парижде француз лидеринин демилгеси менен Киевге колдоо көрсөтүү боюнча өткөн конференцияга Германия, Улуу Британия, Польша, Дания, Нидерланддар баш болгон өлкөлөрдүн лидерлери катышкан.
Франция президенти Эммануэль Макрон Россиянын "бул согушта жеңилиши үчүн" Париж колдон келген аракетин жасай турганын белгилеген. Анын билдирүүсүнөн кийин дароо эле Германиянын канцлери Олаф Шольц менен коргоо министри Борис Писториус Германия Украинага аскер жөнөтпөй турганын, НАТО мамлекеттеринин дегеле андай ою жок экенин айтышкан. Ошондой эле канцлер Украинага Taurus ракеталарын жөнөтүү да пландалбаганын кошумчалаган. Андан сырткары, анын өлкөсүндөгү бир топ ири партиялардын өкүлдөрү да бул мааниси жок кадам болуп калганын белгилешкен.