БИШКЕК, 14-мар. — Sputnik. Ашыкча салмактан арылуу үчүн сөзсүз турдө диета кармоонун же спорт менен машыгуунун кереги жок. Ал үчүн негизги делген төрт эрежени так сактоо зарыл экенин эндокринолог Зухра Павлова Sputnik радиосундагы маегинде айтып берди.
Сууну жетиштүү көлөмдө ичүү
"Биз сууну аз ичебиз. Анын ордуна чай ичүүнү адат кылып алганбыз. Чайды да өзүн эле ичпестен, артынан сөзсүз бир нерсе шам-шум этебиз. Албетте, ошону менен ашыкча калория топтоп алабыз. Тамак ичүүнүн ортосунда жөн эле суу ичүүнү адатка айлантып алуу керек. Бул нерсе жок дегенде үч саатка чейин тамак жөнүндө ойлонбой отурууга жардам берет", — деди адис.
Кундө ысык шорпо ичүүгө аракет кылыңыз
"Өзгөчө күн суукта ысык шорпо ичүү аябай маанилүү. Бирок аны шашпай ичиңиз. Себеби бул убакта организмде керектүү гормондор бөлүнүп чыгып, мээге "курсак тойду" деген сигнал жетет", — деди Павлова.
Тамакты майдалап чайнап жеңиз
"Тамакты болушунча майдалап чайнап жеңиз. Бирок аны блендер менен эзип алуу жарабайт, процесс организмде болушу керек. Биринчиден, буга убакыт сарпталат, экинчиден, ферменттер менен гормондор бөлүнүп, организм толугу менен азыктанат", — деп түшүндүрдү дарыгер.
Уйкуну жөнгө салыңыз
"Уйкусу канбаган адам күндүз таттуу, тамак-аш же кофе ичип өзүн алаксытат. Мунун баары ашыкча калория", — деген эндокринолог.