БИШКЕК, 13-мар. — Sputnik. Кыргызстандын мыйзамдарында колдонулган терминдердин орусча-кыргызча сөздүгү иштелип чыгат. Бул туурасында парламенттин маалымат кызматы билдирди.
Аталган эмгекти жүзөгө ашыруу үчүн Жогорку Кеңештин төрагасынын тескемеси менен ведомстволор аралык жумушчу топ түзүлгөн. Аны вице-спикер Нурланбек Азыгалиев жетектейт.
"Азыркы кезде сырттан келген бир топ эл аралык жаңы терминдер пайда болду. Анын түшүндүрмөсүн так билбей туруп ар кандай мааниде колдонуп келе жатабыз. Демилгенин негизги максаты мыйзамдарда колдонулган терминдердин башаламандыгын жоюу, бирдиктүү системага салып, мамлекеттик тилдин талаптарына ылайык колдонууга жетишүү болуп саналат", — деди Азыгалиев жумушчу топтун биринчи жыйынында.
Биринчи этапта мыйзамдарда колдонулган терминдердин орусча-кыргызча сөздүгү, экинчисинде юридикалык терминдердин түшүндүрмө сөздүгү иштелип чыгат.